EcoLab.gal, o Laboratorio galego de ecocrítica, é un colectivo interdisciplinario de investigadores en rede que reúne estudantes nas súas diversas fases formativas (grao, mestrado, doutoramento) e persoal docente e investigador da Universidade de Santiago de Compostela, investigadores doutras universidades do sistema universitario galego, así como de universidades e centros de investigación nacionais e estranxeiros.
EcoLab.gal nace coa vontade de dar resposta aos investigadores con inquedanzas interdisciplinarias no ámbito das relacións entre natureza, ciencia, ecoloxía, linguas, literatura, arte e cultura. Neste sentido, procura acadar os seguintes obxectivos:
-
Apoiar o traballo interdisciplinario desenvolvido polos investigadores adscritos;
-
Introducir este tipo de contidos no ensino de grao e mestrado (xa está en marcha dende 2016-2017 a materia de grao G5041611);
-
Formar novas promocións de especialistas en sostibilidade;
-
Investigar historias medioambientais a través de contextos disciplinarios, académicos e culturais;
-
Desenvolver colaboracións con organismos públicos e privados;
-
Colaborar con artistas, comunidades e empresas para crear campañas medioambientais estratéxicas;
-
Concursar a fontes de financiación de organismos públicos e privados.
EcoLab.gal, en definitiva, procura pensarmos os desafíos medioambientais contemporáneos —en e dende Galiza— a partir do presuposto de que estes desafíos son tanto culturais e políticos coma científicos e tecnolóxicos. En función da localización da USC, os membros de EcoLab.gal pensan o futuro do medio ambiente e da súa conservación nos seus vencellos cos problemas de equidade e xustiza.
